FORUM MANDAILING

ro ho, ro au , rap ro ma hita, rap ro rap ra

ambukon mada gut-gut i

HORAS TONDI MATOGU PIR TONDI MADINGIN

kepada seluruh pengunjung forum mandaling yang terhormat, forum ini belum memiliki moderator untuk mengendalikan seluruh thread dengan beberapa kategori, di mohonkan tu koum-koum yang luang waktu untuk dapat bergabung menjadi moderator forum ini, hanya membutuhkan loyalitas dan pengetahuan tentang mandailing agar forum ini bisa berkembang ke depannya, terimakasih

    SI BUDAGAL DOHOT SI BUDIGIL

    Share

    Admin
    Admin

    Jumlah posting : 22
    Reputasi-mu : 0
    Join date : 22.02.11

    SI BUDAGAL DOHOT SI BUDIGIL

    Post  Admin on Thu Feb 24, 2011 11:16 pm

    Adong ma dua halak na poso-poso; sada halak margorar si Budagal asa na sada halak nan Si Budigil. Ia si Budagal na tarrabun-rabun do, tai na bisuk na lo paoto-oto halak.

    Ganop an ngada mantak halahi manon bubu. Pala andos torang kehe ma si Budagal sipsip mangaligi bubu i. Torang ari jolo ditondungi ia do sanga marisi bubu i sanga ngada. Pala na so marisi potang doma si Budigil kehe manyidosa, laho manaonsa mulak. Laing songon i ma ganop sogot, angkon jolo ditondungi ia anso kehe si Budigil mangalapsa. Anggo si Budagal ngada dope torang ari na dung binoto nia do no na marisi sanga ngada; pala marisi do disuruhon ia si Budigil mangalapsa; dung ro Ia salaku pursaya situtu ma ia na lo si Budagal martondung, bo dihobarkobarkon ia di halak; jadi bonggal sananua i na bo si Budagal martondung.

    Lohot-lohot manambus ma dapot kalahi tuhor ni ihan i; jadi dipatumona halahi ma marjagal abit, boti markauma ma halahi. Ngada sadia lolot murmur manambus ma jagal ni halahi i.

    Saulak dipaoto-oto si Budagal muse ma si Budigil; dibunihon ia
    barang dagangan ni halahi i borngin tu harangan. Torang ari tar songgot si Budigil, diligi ia dagangan ngada be di si deba, diambang ia na nitangko ni halak. Jadi ro si Budagal, dipaula-ula ia manguyamsa. Adong sangombas, “Madung kuboto da sanga di dia danganta i; dibunihon si panangko i di toru ni tanaon na di juiu ni haumanta an do i sannari. Kehe ma taalap!” ning ia.

    Tolap ro tu si, peto ma di si dagangan i diida si Budigil; jop
    situtu ma roha nia dibaon na dapot i mulak dagangan i. Murmur
    pursaya ma ia na peto malo si Budagal manguyam. Murmur bonggal ma da di huta i na malo si Budagal martondung rongkon manguyam.
    Saulak kehe ma si Budagal borngin manangko tu bagas ni raja
    na di huta iI; dapot ia dompak modom anak ni raja i. Jadi ditangko
    ia, dibunihon ia tu bagasan harangan. Dung ngot inang ni danak i, diligi ia anaknia ngada be di si; henceng halahi na sabagas i manjalahisa borngin i, tai laing so tarpaida do di halahi. Jadi nipalu ma tiawak-tawak rongkon tabu; marlagut ma halak tu bagas na godang i. Dijamitahon raja i ma di halak na marroan i, na dung nitangko ni halak danak i. Jadi sarsar halak tu jae tu julu manjalahisa, tai laing so tarpaida do. Bulus disuru alap raja i ma si panguyam; bo dialap kalak si Budagal; jadi ro ia tu bagas ni raja i. dung dihatahon raja I di Sia, jadi dipaula-ula Ia diuyam ia. Sangombas dung i ning ia ma, “Madung kuboto da sanga di dia anak ni raja i sannari, tai ngada dope tardokon au sanga di dia ingananna, dibaon aha, sapanjang pandok ni guru anggo suada hajalahan hagiot ni si panguyam, ngada jadi dokonon. Tai muda mangoku do hita, morang ku! manjalahi hagiotku, anso hudok sanga di dia ingananna, antargan torkis dope danak i!”

    Ro raja i, “Dokon ma ba tibu sanga di dia anakki sannari; anggo taringot di aha nidokmi do, na momo ma i!”

    Ro alus ni si Budagal, “Angkon taoku do ba mangalei au boru, anso tardokon au!”
    Huoku ma mangalei ho boru: hupabagas pe ho rongkon borungki antapna dapot anakki mulak!” ning raja i.

    “Ngada ba morangku! Tutu gakku songon na hita dokon i, dibaon aha au halak na siak panomuan; tabaen bulus ma naron rohanta ma mangalehensa, ampot ngada bulus roha ni kahanggi-kahangginta. Tai muda mangoku do hita bulus roha ni halahi mangalehensa di au, dioku halahi pabagas au rongkon boru ni raja i, ngada mahua!” ning si Budagal.

    Bulus nipalagut ma santongkin koum kahanggi ni raja i, asa disuru oku raja i ma di halahi nangkan pabagas boru ni raja i rongkon si Budagal. Dung rap mangoku halahi sude, kehe ma halak mangihutkon si Budagal; dioban ia ma halahi tu harangan inganan ni danak i. Dapot kalahi danak i tangis-tangis di ginjang amak; ulosna madung marsampotan. Jadi nioban ma danak i muli; torang ari markorja ma halahi mangupa-upasa.

    Holong situtu ma roha ni raja i di si Budagal, dibaon patunda sinaloannia ma anso dapot mulak danak i. Adong sabulan dung i, niparkaroan ma ia rongkon boru ni raja i. Murmur holong ma roha ni raja i di sia; ngada sadia lolot ditalduskon raja i ma harajaan i; si Budagal doma sorinna antargan so magodang danak nangkinondi. Dung mamora si Budagal, disuru alap ia ma si Budigil. “Ia boti pe i, anggi Budigil! taringot di bonda-bondanta i sude, bo pe bagas, bo pe bagas, bo pe jagalta i, bo pe antong hauma i, di ho doma I!” Jop situtu ma roha ni si Budigil mambegesa asa mangido mauli ate ma ia di si Budagal.

    Tar saton dung humundul si Budagol rongkon boru ni raja i, jadi digora-gora pidong ma tuhor ni serena i; asa dung dapot di arina, sorang ma danak i; jadi nijalahan si parorotna sada halak. Ia anggo koum kahanggi ni raja i indokon ngada bulus roha ni halahi paraja si Budagal, tai dibaon ngada hagagaan hobar ni raja i, dibaon i ma anso laing disipkon kalahi. Tai ngada sombu hosom ni halahi di sia, salaku laing na nijalahan ni halahi do bisuk sanga songon dia anso taldus harajaan i tingon Ia.

    Saulak indokon diupai halahi ma siparorot i mamunihon danak i; ning roha ni halahi dung agoan halak anso nipauyamkon di si Budagal. Pala ngada dapot ia danak i, da pe enek ma roha ni raja i mangida ia. Pala dung songon i, da momo ma i tardabu hita, ning roha ni halahi.

    Ia danak nangkinondi donok do lakna dibunihon siparorot i; nisapaan ia sanga tu dia danak iI, ngada ning ia diboto ia; dompak maridi do ia magona. Jadi di pauyamkon ma da di si Budagal; ho paula-ula ia muse antong manguyamsa. Adong sangombas ning ia, “Madung da huboto sanga di dia anakki; tai jaru da songon i pe ba, ngada dope arop Situtu iba nangkan mulak tu son, dibaon aha, ida-ida di halalangkangku dope: pala denggan do nian parlangkanku manjalahisa, dapot do i mulak; tai pala tongon di parlangkaan na jat, ngada angkan dapot be danak i; tauken na ni tangko ni halak sibunian ma i!”

    Dung i dilajo ia ma kehe manjalahisa. Adong sangombas duang-ombas tolap ma ia tu topi ni aek godang na di lambung ni saba ni halahi i. Untung paruntunganna i dao dope ia, dibege ia ma tangis tangis danak I; bo ditopotkon ia sora i, hape tutu ma sora i, hape tutu ma sora ni anaknia i. Di ruang ni hayu Iakna dipagulung siparorot i danak i. Dioban Ia muli; tolap ro di huta markomangan halak mangida bo pe mambege sinaloan nia menguyam i. Dibaon na dapot i danak i, ngada muba umpe saotik parroha ni raja i di si Budagal, tai murmur martamba dope holong ni rohana di sia.

    Anggo koum kahanggi ni raja i sukut ma milas ni rohana di si Budagal; dibaon i ma laing dipupu halahi do manjalahi bisukna, anso taldus harajaan tingon ia; tai jamuda songon dia pe dibaen kalahi, ngada marjaot; dibaon i ma sapanjang so magodang anak ni raja i, laing ia ma raja di banua iI.

    Ia di si Budigil ngada lupa Ia, dodas do disuru alap Ia tu bagasnia
    i; ia pe antong laing dodas muse do kehe mangulang-ulangisa.
    Lolot-lolot mur maradong ma si Budigil; jadi dipabagas si
    Budagal ma ia rongkon boru ni na mora-mora di huta i.

    Jadi rap sayur ma halahi matua bulung maranak marboru.

    Nani salin mulak ni Tagor Lubis sian buku "PORLAK PARMANOAN" na Nipapungu ni Karimuda oleh Loebis Tagor

    sumber : Grup Facebook Hata Mandailing Di Dunia Datar

      Waktu sekarang Sun Aug 20, 2017 9:15 am